www.xameentendes.blogspot.com

EXPOSICIÓN NO CENIMA:SEN FRONTEIRAS: LUZ E COLOR

2012-02-03T13:01:00.000+01:00

Desde o 4 de febreiro ata o 3 de marzo no CENIMA: PROXECTO DIDÁCTICO DE CREACIÓN ARTÍSTICA SEN FRONTEIRAS: LUZ E COLOR. ARTE-EDUCA.

Esta exposición é a culminación dun traballo ó que se lle vén dando forma desde novembro de 2011. Desde o Concello de Foz, en estreita colaboración co profesorado do Bacharelato de Artes do IES Monte Castelo de Burela, plantexouse unha proposta didáctica de dinamización e de creación artística destinada a toda a comunidade educativa da Mariña, tomando o CENIMA como centro de operacións e como destino final do produto de todo este proceso creativo. A intención da actividade é achegar a arte á sociedade do xeito máis puro posible, desde a ollada dos máis novos.
É a Arte pola Arte, a Arte sen fronteiras e sen límites.
Toda esta experiencia xira arredor dos conceptos da luz e a cor, como elementos esenciais no tratamento da arte, tomando as vidreiras como o referente histórico que fusiona ambos os elementos. Cóntase coa inestimable colaboración de José Luis Neira Brochs, artesán vidreiro, veciño da comarca, cunha recoñecida traxectoria artística alén das nosas fronteiras, e que tamén participa como parte integrante da mostra.
o noso centro participa neste proxecto xunto con alumnado doutros seis centros educativos da Mariña: o CEIP Nº 1, o Colexio Nosa Sra. Do Pilar, e o Colexio Martínez Otero, do concello de Foz; o IES Monte Castelo, de Burela; o IES Alfoz-Valadouro; e o IES Vilar Ponte, de Viveiro. Todos deixan constancia da súa capacidade creativa tanto nenos de 3 anos como rapaces de bacharelato.

En breve amosarémosvos imaxes do resultado final do traballo do noso alumnado. Non vos despistedes e permanecede atentos ao blog nestes días.

12 MESES, 12 LIBROS

2012-01-25T13:02:00.007+01:00

Lembrámosvos (por se hai algún despistado) que na biblioteca tedes a recomendación do libro do mes de xaneiro: A CRIPTA DO APÓSTOLO de PERE TOBARUELA. Ademais tedes información doutros libros do escritor. Cada mes teredes unha nova recomendación que, como sabedes, completa a información do calendario deste ano.

CONCURSO COPLAS DO ENTROIDO

2012-01-23T18:39:00.004+01:00

O Equipo de Dinamización Lingüística do IES de Foz convoca o 10º Concurso de Coplas de Entroido, dirixido a todos os alumnos e alumnas do centro.

A actividade consiste en compoñer coplas populares propias do Entroido ás que lles podedes dar ritmo de rap ou calquera outro ritmo que queirades.

A copla é unha estrofa de catro versos de arte menor, con rima asonante nos pares e carácter popular. Nas de Entroido aprovéitase para peneirar aos que xa “andan en coplas” ou aínda non, para facer mofa ou escarnio, por divertimento ou para provocar.

Mira ao teu redor, olla o que pasa no muMira ao teu redor, olla o que pasa no mundo e arma unhas coplas en galego!!!
Animádevos e participade cos vosos compañeiros de aula compoñendo unhas boas coplas cheas de imaxinación e bo humor!!!

PREMIO: Entre os gañadores repartiranse 60 € e as súas creacións aparecerán publicadas na revista do Centro, no blogue do ENDL no blogue da biblioteca. A entrega de premios realizarase o venres, 17 de febreiro durante a xornada de celebración do entroido.
Tod@s os que queirades poderedes interpretar as vosas composicións.

DATA DE ENTREGA: Os traballos poderanse entregar ata o xoves día16 de febreiro de 2012 na biblioteca ou a calquera dos profesores do Equipo de Normalización Lingüística.

Manolo Sánchez
Ánxeles Peláez
Fefi Xove

CURSO DE MICRORRELATOS: PAZ E AMOR

2012-01-23T18:10:00.012+01:00

Bases

1. A temática do relato é a paz e o amor. Poderá estar escrito en galego ou en castelán. A extensión máxima é de 250 palabras.

2. Entrega antes do luns 6 de febreiro na biblioteca o teu relato asinado co teu nome e curso. Publicarémolo no panel do concurso. Tamén seleccionaremos algúns relatos para os blogs do instituto.

3. O día 13 de Febreiro o xurado composto por profesores do IES de Foz outorgará tres premios ( microrrelato máis divertido, máis orixinal e mellor escrito). Os gañadores recibirán un lote de libros, música ou cine.

Se queredes ver algún exemplo de microrrelatos, podedes pasar pola biblioteca. Alí tedes algúns expostos.

2012-01-17T20:54:00.002+01:00

Desde este pequeno espazo na rede queremos manifestar que o EDL do IES de Foz suscribe totalmente todo o expresado no seguinte documento elaborado pola Coordinadora Galega de ENDL. Aquí vos deixamos o documento para que o poidades ler e reflexionar sobre o que di. Non estaría de máis que o novo Secretario Xeral de Política Lingüistica lle botase unha ollada para evitar levar a cabo unha xestión tan nefasta como a do seu predecesor no cargo.

VALORACIÓN DA XESTIÓN DO SECRETARIO XERAL DE POLÍTICA LINGÜISTICA

A CGENDL despide ao Secretario Xeral de Política Lingüística desaprobando a súa xestión e lamentando a herdanza que deixa, nomeadamente no ámbito do ensino, no que a lingua galega sufriu unha involución lexislativa sen precedentes
Co anuncio feito onte por parte da Xunta de Galicia da marcha do actual Secretario Xeral de Política Lingüística ponse fin a unha das etapas máis nefastas deste organismo, durante a que se adoptaron medidas lesivas para a nosa lingua en todos os ámbitos, se lanzou un discurso negativo ao redor do idioma e se crearon novos prexuízos, mesmo amparados e potenciados pola propia administración galega.
Esta situación foi se cabe máis grave no que respecta ao ensino, ambito no que se desenvolve a CGENDL, xa que durante os anos de xestión de Anxo Lorenzo se tomaron unha serie de medidas que nos reiteran nunha valoración negativa do seu traballo á fronte da SXPL:

1/ A derrogación do decreto 124/2007, que desenvolvía a LNL e recollía as medidas do Plan Xeral de Normalización, refrendado por unanimidade no Parlamento Galego coa finalidade de asegurar que o alumnado rematase os seus estudos obrigatorios con plena competencia en ambas linguas oficiais.

2/ A aprobación do decreto 79/2010, que reduce a presenza do galego como lingua vehicular no ensino e imposibilita que a maioría das materias do ámbito científico-tecnolóxico se impartan en galego, contribuíndo a desandar o lento camiño que se trazara na dignificación da lingua.
Ademais de acentuar o desequilibrio entre as linguas oficiais, ao abeiro deste regulamento equiparouse o ensino das linguas estranxeiras ás linguas oficiais e creáronse os centros plurilingües, nos que calquera materia se pode impartir en inglés ensaiando a inmersión neste idioma, mais non se establecen os mecanismos para asegurar que o alumnado acade a competencia en lingua galega ao rematar o ensino obrigatorio, tal e como procura a lexislación educativa en materia lingüística.

3/ A supresión, en contra da opinión do profesorado e das familias, das exitosas liñas de galego en Educación Infantil que posibilitaban un ensino na nosa lingua nos
primeiros anos de escolarización. Así mesmo, a enquisa programada para escoller a lingua nesta etapa, ademais de enfrontar á sociedade e ser excluínte, elimina a aprendizaxe en galego nos contornos urbanos e semirubanos a pesar da opinión dunha importante porcentaxe das familias.

4/ A falta de interese por aumentar os recursos didácticos, actualizados e de calidade para impartir aulas en galego e por elaborar recursos para a súa aprendizaxe por parte do alumnado estranxeiro e do que ten necesidades educativas especiais.

5/ A despreocupación por dotar o Programa Abalar de materiais en galego (sendo este escasísimo incluso para aquelas materias que deben impartirse na nosa lingua), feito que está a provocar que o idioma fique abeirado nas novas tecnoloxías.

6/ A inacción ante cuestións importantes para o idioma como a desaparición de diversos medios en lingua galega, que son recursos de grande valor didáctico e normalizador, a desaparición de ferramentas normalizadoras de uso didáctico (flocos.tv, oferta cultural aos centros...) ou algunhas simbólicas e de plena actualidade como o silencio outorgador ante a falta de rigorosidade do Valedor do Pobo na censura dun libro de texto.

7/ O abandono dos Equipos por:

● o desamparo ante os ataques criminalizadores que sufrimos e seguimos a sufrir por parte de sectores antidemocráticos que unicamente buscan a desaparición da nosa lingua,
● a falta de coordinación real das actividades normalizadoras dos equipos,
● a ausencia de medidas que faciliten o labor diario, como a regulación de horas de dedicación para os membros dos EDLG, a posta en marcha de programas formativos e de propostas para desenvolver nos centros, a transmisión de información e orientación correcta do traballo, etc., e
● a falta de apoio económico que impide unha planificación seria do traballo: rematou o 1º trimestre do curso 2011-2012 sen que lles ingresaran aos centros as axudas resoltas en novembro de 2010 e neste momento aínda non se convocaron as deste ano, que contemplan un 33% de recorte (dende o ano 2009 a diminución das axudas foi dun 60%). Como consecuencia disto, reséntese fortemente a programación cultural dos centros educativos, desenvolvida en grande parte polos EDLG, que complementan con numerosas actividades a formación do alumnado.

A CGENDL agarda que este departamento comece unha nova etapa na que asuma as funcións que lle son propias e pase a planificar e executar políticas de fomento e promoción do galego na sociedade.

CELEBRAMOS O NADAL NO NOSO CENTRO

2011-12-21T12:41:00.009+01:00

Nestas imaxes podedes ver o resultado dos vosos traballos para decorar o noso centro. Moitas grazas pola vosa colaboración e Bo Nadal a tod@s.

DÍA DOS DEREITOS HUMANOS

2011-12-21T12:18:00.008+01:00

Con motivo da celeración do Día dos Dereitos Humanos, o alumnado do IES de Foz realizamos unha actividade coa axuda do profesorado. A actividade foi proposta polo equipo de traballo da biblioteca e o EDL. Cada curso creou carteis que tiñan como tema un dos Dereitos Humanos. Con todos os traballos decoramos uns paneis que logo colocamos na entrada do centro. Nestas parcartas reflexábase o dereito do que se falaba, as súas consecuencias para as persoas e tamén aparecían imaxes que facían referencia a el. Esta foi a nosa pequena colaboración para conmemorar esta data tan importante. Aquí vos deixamos unha pequena mostra dos traballos elaborados. A ver que vos parece.

Alba Díaz Fernández. 4º ESO B

A QUEN VALE O VALEDOR?

2011-12-16T09:20:00.002+01:00

Estamos acostumad@s xa dende hai un tempo a ler e escoitar noticias sobre ataques á nosa lingua. Pero a última supera con creces a todas as demais. Cal se supón que é o papel do Valedor do Pobo? A quen representa? Que intereses defende? Se tiñamos algunha dúbida ao respecto, cremos que despois da súa denuncia polo contido dun libro de texto de Coñecemento do Medio, xa nos queda ben claro. Evidentemente non representa @s galeg@s que, coma nós, teñen unha lingua propia e a queren e respectan.

Aquí tedes un interesante artigo de Suso de Toro sobre o tema.

DAQUELAS QUE CANTAN

2011-12-15T18:15:00.007+01:00

O Observatorio da Mariña pola Igualdade presenta a Axenda Feminista 2012 “Daquelas que cantan”, adicada este ano ás músicas galegas.Trátase dunha homenaxe ás intérpretes, vocalistas, compositoras, artistas e cantautoras que hoxe en día conforman unha rica polifonía de estilos e propostas variadas en Galiza.

Para visibilizar o seu traballo, cada mes da axenda está encabezado por unha das nosas moitas músicas, cunha foto delas e cun texto que elas mesmas concebiron e redactaron expresamente para esta axenda. Uxía, Guadi Galego, Silvia Penide, María Xosé Silvar, Mercedes Peón, Ugia Pedreira, Susana Seivane, Rosa Cedrón, Leilía, Carmen, Maruxa e Tareixa de Fuxan os Ventos, Sonia Lebedynski e as Batuko Tabanka conforman a axenda do Observatorio para o 2012.

A presentación para todo Galiza será o próximo sábado 17 de decembro, ás 12.30h, na libraría compostelá Lila de Lilith (rúa Travesa, nº7). Na mesma, a xente que o desexe xa poderá mercar a axenda e contribuír así a seguir loitando por unha sociedade máis xusta e igualitaria.

Posteriormente a axenda poderase adquirir na citada libraría ou poñéndose en contacto co observatorio a través do mail observatorioigualdade@gmail.com. Tamén haberá unha presentación oficial na Mariña e se facilitará un listado das librarías da Mariña nas que se poida adquirir a axenda.

Non quedes sen ela! Fai xa a túa reserva!

XORNADAS GASTRONÓMICAS: A COCIÑA DE CUNQUEIRO

2011-12-15T11:06:00.012+01:00

Continuamos celebrando o centenario do nacemento de Álvaro Cunqueiro. E que mellor forma de facelo que degustando uns estupendos pratos elaborados con produtos gastronómicos citados polo escritor nas súas obras. Non só en A cociña galega senón tamén en: Merlín e familia, Si o vello Simbad volvese ás illas, Tesouros novos e vellos, Crónicas do Sochantre ...

O alumnado de Hostalería do noso centro elaborou un estupendo menú: polbo á feira, arroz con berberechos, orella frita, lacón con grelos..., e como non: torta de Mondoñedo.

Para relacionar cociña e literatura ocorréusenos a idea de facer uns servilleteiros con citas de obras do escritor alusivas á cociña así como tamén identificar cada mesa cunha obra do autor, cuxa portada do libro figuraba na carta. Amosámosvos estas fotos para que vexades cal foi o resultado.

GAÑADOR@S DO CONCURSO DE TARXETAS DE NADAL

2011-12-13T22:09:00.010+01:00

Xa temos gañador@s do concurso de tarxetas de Nadal 2011. Noraboa a tod@s e moitas grazas a tod@s @s que participastes. Lembrade que os vosos traballos estarán expostos nas árbores de Nadal na entrada principal do edificio A.

1º PREMIO: Sabela Fernández Rodicio. 4º ESO B

PREMIO AO ESFORZO: Carla Gallo Marcos. 3º ESO A

PREMIO Á ORIXINALIDADE: Bruno Martínez. 1º ESO B

MONDOÑEDO PREPARA A CELEBRACIÓN DO CENTENARIO DO NACEMENTO DE CUNQUEIRO

2011-12-02T12:49:00.004+01:00

A asociación cultural 'Abrindo Camiño', coa colaboración do Concello de Mondoñedo, a Diputación de Lugo, a Editorial Galaxia e a familia do propio escritor, prepara unha representación teatral da obra "A Noite de Merlín", na que participarán máis de duascentas persoas, para celebrar o centenario do nacemento de Álvaro Cunqueiro.Como director de coreografía de "A noite de Merlín" exerce Isidoro Rodríguez Pérez, mentres que Elías Noel é o guionista e Xan Carballal, director da Escola de Música de Mondoñedo, compuxo a música que se interpretará en directo durante as máis de tres horas que durará a representación. Durante a representación da obra proxectarase unha produción audiovisual que recolle escenas das anteriores representacións esta obra.

A homenaxe que terá lugar o venres, 17 de decembro completarase cunha mesa redonda sobre a "poesía, o teatro e a fábula" na obra de Cunqueiro.

CATALUÑA ACHÉGASE A CUNQUEIRO

2011-12-02T12:35:00.004+01:00

A Universitat de Barcelona e o seu Centro de Estudos Galegos organizaron onte unha xornada sobre o autor mindoniense. A través de dúas mesas redondas analizaron a estreita relación que Cunqueiro mantivo con Cataluña grazas á súa amizade coa intelectualidade da comunidade e á súa colaboración con algunhas publicacións.
A homenaxe complétase cunha exposición bibliográfica que permanecerá aberta ata o día 15 na Biblioteca de Lletres da Universitat de Barcelona.
Os actos adicados a Álvaro Cunqueiro súmanse ao seminario sobre Rosalía de Castro organizado polo centro de estudos galegos da capital catalá baixo o título "Unha musa fecunda"

CUNQUEIRO DE CUMPREANOS

2011-12-01T11:37:00.009+01:00

Para celebrar o centenario do nacemento do escritor mindoniense Álvaro Cunqueiro, alumnado de todos os cursos, profesorado, persoal non docente e pais e nais participamos nun recital de distintos textos da obra do autor: Os outros feirantes, Merlín e familia, A cociña galega, Poemas do si e non, Dona do corpo delgado, Se o vello Simbad volvese ás illas ...
Este acto, que foi acompañado dunha presentación en Power Point que amosaba un percorrido pola vida do autor, serviu tamén para inaugurar o curso de actividades da biblioteca e do ENL.
@s destinatarios da actividade foron @s alumn@s de 1º ESO, para que visen o funcionamento e o tipo de actividades que se realizan na biblioteca.

HABERÁ PRIMAVERA, NOVO LIBRO SOBRE CUNQUEIRO

2011-11-28T17:37:00.005+01:00

A editorial Galaxia acaba de publicar un libro-disco Haberá Primavera con catorce poemas de Cunqueiro cantados por César Morán. Un segundo disco inclúe a derradeira entrevista concedida en vida por Álvaro Cunqueiro ao autor deste volume.

SERMOS GALICIA

2011-11-18T12:28:00.006+01:00

Un grupo promotor de catorce persoas de distintos ámbitos sociais anuncia a intención de botar a andar un diario dixital e un semanario en papel, un proxecto que consideran “urxente e necesario” nun momento de abafamento dos medios en galego. O obxectivo de Sermos Galiza é ofrecer á cidadanía un produto informativo novo e distinto, ao dicir dos seus promotores, “que defenda os intereses da Galiza na nosa lingua, que cree redes de participación e sexa a voz da cidadanía e que sexa, en definitiva, un proxecto colectivo que nace e se desenvolve pola forza e o entusiasmo dos e das que cremos neste país e no seu futuro”.

Dende este pequeno espazo da rede queremos amosar o noso apoio a esta brillante e tan necesaria iniciativa nestes tempos tan nefastos para os medios de comunicación na nosa lingua.

Este foi o acto de presentación en Foz:

DÍA INTERNACIONAL DOS DEREITOS HUMANOS

2011-11-17T10:50:00.006+01:00

10 DE DECEMBRO

DÍA INTERNACIONAL DOS DEREITOS HUMANOS

Con motivo deste día queremos, entre todos, facer unha reflexión a través dun traballo artístico e colaborativo. Propoñémosvos elaborar un cartel no que, a través dunha imaxe, un collage, un debuxo, … expresedes o que vos suxire o artigo que colocamos na vosa aula.

NORMAS

1. Haberá un único cartel por aula, ( polo tanto, debedes falar sobre o artigo que vos tocou e poñervos de acordo en qué aspecto queredes resaltar e cómo o ides facer)

2. No cartel debe aparecer o texto do artígo da declaración que vos tocou expresar.

3. Haberá cómo mínimo unha imaxe. (Pode ser unha foto, un debuxo, un collage, unha viñeta, … Sede creativos!)

4. Aparecerá un texto no que se explique o que quixestes expresar con esa imaxe.

PRAZO: Entregaranse os traballos na biblioteca escolar antes de día 2 de decembro.

MATERIAL:Haberá unha única cartulina (do formato axeitado)por aula na conserxería para realizar os carteis.

Todos os traballos serán expostos posteriormente nun lugar visible do centro.

2011-11-14T18:41:00.003+01:00

Concurso de tarxetas de Nadal

O Equipo de Normalización e Dinamización Lingüística anímavos de novo a participar no concurso de tarxetas de Nadal.

Como xa sabedes, trátase de elaborar unha tarxeta de felicitación que transmita unha mensaxe relativa a sentimentos tales como o amor, a paz, a solidariedade, o respecto, a tolerancia… ou calquera outra idea que vós asociedes ao tempo de Nadal pero que non ten por que ser un dos motivos típicos destas festas.

O debuxo que propoñades pode estar realizado con distintas técnicas (asesorádevos cos- coas vosos-as profesores-as de Plástica ou de Informática), en color ou branco e negro, e irá acompañado dunha cita literaria en galego que podedes buscar vós mesmos-as, consultar cos membros do equipo (Manolo Sánchez, Fefi Xove, Ánxeles Peláez) ou un refrán relativo ao tempo do inverno.

O formato das tarxetas será A-5.

O prazo de presentación dos traballos remata o venres, 9 de decembro. Encargaranse de recoller os traballos os-as profesores-as de Plástica.

Todos os traballos presentados serán expostos no centro e a postal gañadora será enviada como felicitación de Nadal a toda a

comunidade educativa.

Ademais haberá premios para os tres mellores traballos.

Animádevos e amosade a vosa creatividade!!!

FUTURO INCERTO DOS EDL

2011-11-14T17:57:00.002+01:00

Retomamos o noso blog sen saber a estas alturas que vai pasar cos Equipos de Dinamización Lingüística. A día de hoxe continuamos sen ter ningunha nova relativa á convocatoria dos proxectos de fomento do galego. O malestar e a indignación que sentimos ante esta situación non nos vai impedir seguir traballando a prol da nosa lingua.
Se o que pretende a Consellaría de Educación é desanimarnos e desmotivarnos, non o vai conseguir. Dende este pequeno espazo na rede animamos a tod@s @s compañeir@s a continuar co seu labor.
Temos unha lingua de noso e nunca nola poderán arrebatar.

LINGUAXE NON SEXISTA NAS AULAS

2011-06-01T13:02:00.006+02:00

Olga Castro, licenciada en Ciencias da Comunicación e especialista en linguaxe e xénero, achegouse ao noso centro para dialogar cun grupo de profes. O tema da exposición, LINGUAXE NON SEXISTA NAS AULAS, orixinou un interesante debate que serviu para unha reflexión máis profunda sobre o tema.

CORRELINGUA 2011

2011-05-25T13:06:00.007+02:00

Un ano máis, os centros da mariña celebramos a carreira da lingua. Este ano, e por fin baixo un sol radiante, co lema EN GALEGO SEMPRE SOMOS, o noso alumnado percorreu as rúas de Burela. O acto rematou na praza do concello coas actuacións do mago Martín Camiña, un grupo de Cantalingua e o concurso de galeoke.
O manifesto foi lido po alumnado do IES Porta da Auga de Ribadeo, que foi o que gañou o concurso do manifesto na edición anterior.

INTERESANTES PRESENTACIÓNS

2011-05-01T20:15:00.006+02:00

Aquí tedes 4 interesantes presentacións elaboradas por Manuel Núñez Singala. Agardamos que vos fagan reflexionar, aínda que só sexa un pouquiño.

PARABÉNS A BERROGÜETTO

2011-04-29T13:35:00.003+02:00

O grupo foi galardoado cun dos Premios da Música 2011 deste ano na categoríoa de mellor canción en galego pola súa versión musicada dun poema do escritor Manuel Rivas.

MÁIS VALE TARDE QUE NUNCA!!!

2011-04-28T13:23:00.003+02:00

Despois de nove meses de espera o TSXG pariu por fin a súa decisión de admitir a trámite o recurso da Real Academia contra o actual decreto do plurilingüismo. Con este son xa tres os recursos admitidos a trámite contra este decreto pola Xustiza e aínda tres están pendentes á espera de ser aceptados.
A noticia en Xornal de Galicia.

GAÑADORES-AS CONCURSO DE COPLAS

2011-03-03T14:00:00.003+01:00

Xa temos gañadores-as do CONCURSO DE COPLAS. Despois de ler os seus traballos, veredes que boa canteira de copleiros temos no noso instituto.

A entrega de premios será mañá no salón de actos. NON FALTEDES!!!

TÍTULO: SANTIAGO-BARCELONA

AUTORAS: Alba Díaz, Ana Gay (3º ESO A)

Alumnos e profesores
hoxe ímoslles contar
a historia de Maruxa
que quedou sen fogar.

Ela tiña unha tenda
a crise fíxolla pechar
e ao quedar sen ganancias
o piso non ha pagar.

Ela éche de Barcelona
non ten onde se quedar
e despois de durmir fóra
ao aeroporto foi parar.

Rematou pedindo esmola
un voo conseguiu mercar
con destino a Galicia
pra o apostol visitar.

Ao chegar a Santiago
foi directa á catedral
rezou catro pais nosos
e un credo sen final.

Para volver á súa terra
ela fixo o camiño
Santiago-Barcelona
ao revés que os peregrinos.

Un día atopou traballo
na oficina de emprego
case que se volve tola
e gañou moito diñeiro.

Mira que sorte a de Maruxa
sorte que lle deu o apostol
que nestes tempos de crise
é difícil ter un posto.

TÍTULO: AS MULLERES VÓLVENNOS TOLOS

AUTORES: JESÚS AMOR, RICHARD GONZÁLEZ (3º ESO A)

Elas van a Portugal
que ben imos nós estar
non o imos pasar mal
e xa non nos tolearán.

Ai que contentos estamos
non as temos que escoitar ...
sempre están "dálle que dálle"
e non paran de falar!!!

Hoxe imos facer festa
elas vanse por tres días
imos traer unha orquestra
e tamén unhas "tías".

Alfonso está moi triste
váiselle a súa amada
voulle contar un chiste
por se lle mellora a cara.

A ver se cando elas volvan
tranquilizan o carácter
para poder falar con elas
como persoas normais.

Hoxe en día as mulleres
están revolucionadas
todas queren o poder
e a nós non nos dan nada.

Ai mulleres, mulleriñas!!!
que sería de nós sen vós
non teriamos fillas e fillos
e estariamos moi sós.

TÍTULO: AI, AI, AI, AI

AUTORES: ALUMN@S DE ATENCIÓN EDUCATIVA (1º ESO A)

O exame de Amparo
foiche ben complicado
imos cantar unhas coplas
por se o damos amañado.

o Ayoub e mais o Hamza
xa che son xente de aquí
falan castelán, galego
e tamén o marroquí.

Ai Jorge, ai Jorge Cuesta
un rapaz espabilado
se non estudia a ESO
remata de xubilado.

Ai María, ai María,
non te polñas colorada
moito miras para ese neno
debes estar namorada!!

Ai Marquiños, Ai Marquiños,
sempre esta´s na play xogando
inventando fantasías
e mais nas mozas pensando.

Ai FLorencia, ai Florencia,
rapaza moi dilixente
busca un mozo ben bo
e que sexa ben decente.

Ai Asier, ai Asier,
que xogas de medio centro
moito chutas, moito chutas
e non metes unha dentro.

Ai Flavia, ai Flavia
sempre coa risa na cara,
bule-bule a todas horas
e na clase ela non para.

Ai Antía, ai Antía
moito te quedas na casa
pouco ao instituto vés
xa nos dirás que che pasa.

Ai Alex, ai Alexandro
deixa xa de debuxar
mira que senón Begoña
o corpo che vai canear.

Ai Suso, ai Suso
hai que barbearse máis veces
non sexas tan preguiceiro
hancho agradecer con creces.

Ai Ánxeles, ai Ánxeles
por que non me dás na ESO?
vente para a miña clase
gústame o teu pelo crecho.

Só nos queda unha rapaza
que se chama Adriana
ten unha fal moi doce
éche unha dominicana.

SEMANA DAS CURTAS

2011-02-25T12:42:00.004+01:00

O Equipo de Dinamización da Lingua Galega do IES Audiovisual de Vigo, en colaboración coa
Cordinadora Galega de ENDL (CGENDL), presenta a actividade “A Semana das Curtas”, un proxecto de fomento do uso da lingua galega para o curso 2010-2011 dirixido aos centros escolares, en especial aos Equipos de Dinamización da Lingua Galega e ao alumnado de ensino secundario.
O noso centro é un dos moitos que participará nesta actividade e a próxima semana poderedes ver un ciclo de curtametraxes e vídeoclips en galego. Así mesmo teredes un espazo web e un blogue para que poidades opinar sobre as distintas pezas. Deste xeito, poderedes establecer contacto con outros-as mozos e mozas, opinar sobre as filmacións que máis vos gustaron, contrastar opinións con outras persoas e votar pola curta e sesión que máis vos gustou (procurarase realizar unha votación virtual para establecer honorificamente o “premio do público”).
As temáticas e xéneros das sesións serán:

- O cinema fantástico
- O thriller
- A comedia
- O cinema bélico

Esperamos que a actividade sexa do voso agrado e que as curtas vos gusten.

BEN FALADO

2011-02-20T10:50:00.002+01:00

Aquí tedes a última gravación do programa da TVG Ben Falado. Que vos parece?

CELEBRACIÓN DO DÍA DOS NAMORADOS

2011-02-18T13:20:00.013+01:00

Esta semana quixemos celebrar no noso centro a festividade dos namorados, e o que se nos ocorreu foi facer un recital de textos amorosos de distintos autores e en distintas linguas: castelán, galego, francés, inglés,árabe, portugués, latín e grego.Moitas grazas a todos os participantes.

Aquí vos deixamos algunhas instantáneas do acto.

QUE MÁGOA!!!

2011-02-17T14:15:00.001+01:00

SENADORAS DO PP "ORGULLOSAS DE SU LENGUA: EL ESPAÑOL"

2011-01-20T13:03:00.005+01:00

Nun día moi importante para a nosa lingua xa que por 1ª vez existía a posibilidade de usar o noso idioma no Senado, o PP sorprendeunos unha vez máis cando criamos que era imposible aldraxar máis a nosa lingua.
Dúas senadoras do PP negáronse a utilizar o galego nas súas intervencións, iso si, afirmando que "desde luego amamos a Galicia y a nuestra lengua gallega de la que nos sentimos muy orgullosas, pero vamos a utilizar el castellano". Non vos parece que a nosa lingua non necesita amantes deste tipo? Entenden estas dúas senadoras cal é o significado de sentirse orgullosas?Porque os que realmente amamos a nosa lingua e nos sentimos orgullosos dela levámola a todas partes.
Aquí tedes máis información.

ÁLBUM DO ENTROIDO

2011-01-20T10:52:00.004+01:00

Aproxímanse as datas de celebración do Entroido e por iso vos propoñemos unha actividade que necesita da participación de todos vós e das vosas familias. Queremos facer un ÁLBUM DO ENTROIDO con fotografías de todas as épocas que recollan instantáneas da celebración da festa ao longo do tempo. Con elas faremos unha exposición que estará acompañada de pequenos textos referidos ás mesmas. Así intentaremos elaborar unha pequena historia da celebración do Entroido na nosa vila.

Agardamos a vosa colaboración.

CONCURSO DE SMS DE NADAL

2010-12-20T08:59:00.002+01:00

A coordinadora galega de ENDL organiza un concurso de SMS con mensaxes de Nadal no que podedes participar tod@s. É moi sinxelo participar e vós mesm@s seredes @s encargados de escoller os traballos premiados. ANIMÁDEVOS E PARTICIPADE!!! DEIXADE VOAR A VOSA IMAXINACIÓN!!. Consultade toda a información.

GAÑADORAS DO CONCURSO DE TARXETAS DE NADAL

2010-12-20T08:42:00.005+01:00

As gañadoras do concurso deste ano son:

PRIMEIRO PREMIO: Julia García Currás (3º ESO A)

PREMIO Á ORIXINALIDADE: Sabela Fernández Rodicio (3º ESO A)

PREMIO AO ESFORZO: Alba Basanta Lorido (1º ESO A)

Os premios entregaranse o mércores, 22 de decembro, ás 11.00 no salón de actos.

GAÑADORES-AS DO CONCURSO "NÓS E OS LIBROS"

2010-12-19T16:55:00.013+01:00

Aquí tedes as fotografías d@s gañadores-as do concurso de fotografía. Os premios entregaranse no salón de actos do instituto o mércores, 22 de decembro, ás 11:oo. Noraboa aos gañadores-as.

1º-2º CICLO DE SECUNDARIA, CICLOS MEDIOS

PRIMEIRO PREMIO: Melly Díaz, 3º ESO A

SEGUNDO PREMIO: Jesús Amor, 3º ESO A

BACHARELATO, CICLOS SUPERIORES

PRIMEIROS PREMIO: Lucía Villarino, 1º BACHARELATO

2º PREMIO: Ana Alonso, 2º BACHARELATO

BEN FALADO DE NOVO

2010-12-10T17:27:00.003+01:00

Aquí tedes unha nova gravación do programa da TVG BEN FALADO. Poderedes comprobar que ben quedades diante das cámaras. Un millón de grazas a tod@s pola vosa colaboración.

UN NOVO PASO ATRÁS NA NORMALIZACIÓN DO COMERCIO

2010-12-02T19:37:00.002+01:00

ALCAMPO elimina a cartelería en galego dos seus establecementos. Formará parte isto do concepto que Anxo Lorenzo, Secretario Xeral de Política Lingúística, ten ao respecto da normalización? Lembremos que en reiteradas ocasións puxo de manifesto que o proceso de normalización do galego non só estaba relacionado co ensino senón que tamén había outros moitos ámbitos nos que traballar. Pois aquí temos unha mostra máis da política lingüística do goberno galego.

O BILINGÜISMO OU A IMPOSICIÓN DO ESPAÑOL

2010-12-02T19:26:00.003+01:00

Recomendámosvos que vexades esta gravación que reflicte á perfección a imposición do castelán nos anos 70. Non deixedes de ler o artigo que aparece ao respecto do tema. Xa veredes canta razón ten.

ISTO SI QUE É COHERENCIA

2010-12-02T18:58:00.003+01:00

Fernández Paz rexeita o Premio da Cultura Galega

O escritor, nun comunicado, declina aceptar o galardón e explica que os seus motivos están

no manifesto que Prolingua publicou o 8 de outubro

Aquí tes máis información.

O MAGO TETO NO IES de Foz

2010-11-25T13:55:00.016+01:00

A visita do mago Teto reuniu os-as alumnos-as de 3º, 4º ESO e 1º BACH no salón de actos do instituto. Durante unha hora puidemos disfrutar da maxia deste artista, quen cos seus trucos, para nós inexplicables, nos fixo sentir o pracer de comprobar que hai algo máis que o que a simple vista se ve.
Con suspense, converteu un billete de 5€ nun de 10. Fixo desaparecer outro que apareceu nun pitillo ..., pero sen dúbida o que máis me impresionou foi ver como facía desaparecer un pano branco ou como, pouco a pouco, ía convertendo o pano branco nun pano azul. Bo espectáculo de maxia !!!

Diego Rega García, 3º ESO B

Pensei que o mago Teto ía ser un deses magos que fan trucos cutres, pero non foi así senón que foi un mago que fixo verdadeira maxia. Comezou a actuación sacando cartas sen parar e contando moitas cousas graciosas (nunca me rira tanto). detrás de min estaba sentada unha rapaza que non parou de rir durante a hora que durou a actuación. Oxalá que volva axiña polo centro!!!

Manuel Sanjurjo Rodríguez, 3º ESO B

Eu fun ver o espectáculo de maxia con poucas expectativas xa que pensei que se lle verían todos os trucos e que sería unha hora perdida, pero equivoqueime xa que o mago era bo e ademais moi divertido. Paseino moi ben, o espectáculo foi entretido e fixo algúns trucos inexplicables. O mago pediu a colaboración de xente do público, tanto de alumnos-as coma de profesore-as, pero algúns resultaron ser colaboradores un pouco sosos. A actividade gustoume moito e o mago soubo actuar moi ben.

Xián Paz Díaz, 3º ESO B

O mércores, 17 de novembro, asistimos ao espectáculo de maxia do mago Teto. Para min, foi unha experiencia divertida e entretida xa que o mago conseguiu impresionar a toda a sala cos seus trucos de maxia e as súas bromas. Tamén me gustou porque non era o típico mago con capa e chisteira, senón que foi moi cercano a nós como se fose un máis. Gustaríame outra representación dun mago coma o mago Teto!!

Julia García Currás, 3º ESO A

Despois de varios días de espera chegou o día no que nos facía unha agradable visita un mago, chamado o mago Teto. Foi incrible, facía trucos boísimos que nos deixaron abraiados, desde facer desaparecer obxectos ata facer que se transportasen dun lado para outro. Fixo trucos coa axuda do público. alumn@s e profes, e mesmo participou o xefe de estudos, a quen o mago lle gastou unha broma dicíndolle: "Penso que imos ao mesmo ximnasio".
O truco que máis me gustou foi cando lle pediu a xente do público que escollese uns números e logo estes apareceron nunha folla de periódico que queimou. Recordo ben os números: 743.
Pasámolo tod@s moi ben, o mago era simpático, alegre e o máis importante, bo mago.
É unha pena que a maxia non exista e que todo o que fixo fosen trucos.

Aarón López Fernández, 3º ESO B

GRAVACIÓN BEN FALADO

2010-11-20T20:11:00.003+01:00

Lembrades a gravación do programa BEN FALADO? Sodes uns artistas estupendos e o resultado foi moi bo. Vede o vídeo e comprobádeo.

INCRIBLE PERO CERTO

2010-11-16T19:53:00.002+01:00

O EDLG do IES de Foz (supoñemos que coma a inmensa maioría dos centros educativos) quere manifestar o seu malestar polo que nos parece unha nova tomadura de pelo da Consellería de Educación.
Onte, 15 de novembro, data límite (para abraio de todos os EDLG) para a entrega de facturas correspondentes ao 1º cuadrimestre do curso actual, publícase no DOG unha orde que amplía o prazo para a xustificación de gastos!!!
Aquí temos de novo outra improvisación do Sr. Jesús Vázquez Abad, Conselleiro de Educación e do seu brillante equipo que tan ben o asesora.
Cando todos os equipos nos volvemos loucos para xustificar os gastos na data inicialmente marcada e despois de que a Consellaría fixese oídos xordos á petición de cordura para establecer uns prazos viables, (lembremos que o prazo para a reclamación de Proxectos rematou o día 13), agora teñen esta brillante idea.
Será que agora recapacitaron e finalmente están preocupados polo proceso de NORMALIZACIÓN(xa sabemos que esta palabra non lles gusta nada) LINGÜÍSTICA? Ou o que intentan é acabar coa paciencia de toda a xente que traballamos arreo nos centros a prol da nosa lingua?
Que cadaquén saque as súas propias conclusións.

2010-11-16T19:37:00.005+01:00

Concurso de tarxetas de Nadal

O Equipo de Normalización e Dinamización Lingüística anímavos de novo a participar no concurso de tarxetas de Nadal.

O formato das tarxetas será A-5.

O prazo de presentación dos traballos remata o venres, 10 de decembro. Encargaranse de recoller os traballos os-as profesores-as de Plástica.

Todos os traballos presentados serán expostos no centro e a postal gañadora será enviada como felicitación de Nadal a toda a

comunidade educativa.

Ademais haberá premios para os tres mellores traballos.

Animádevos e amosade a vosa creatividade!!!

PARABÉNS Á COORDINADORA GALEGA DE ENDL

2010-11-14T21:22:00.003+01:00

A Coordinadora Galega de ENDL recibe o premio Altofalante 2010, concedido pola asociación cutural ribeirense ALTOFALANTE.

A Xunta directiva destacou como méritos á hora de conceder o premio, os seguintes:

* Ser quen de xuntar a unha parte moi importante das comunidades educativas de Galicia de cara a coordinarse e actuar conxuntamente no ámbito da normalización lingüística nos centros.

* Participar activamente -dando argumentos pedagóxicos e lingüísticos- da necesidade de que o noso idioma teña maior presenza no sistema educativo.

* A capacidade para integrar no seo da organización a profesionais do ensino público, privado e privado-concertado e de todos os niveis educativos.

* Organizar campañas de sensibilización e dinamización da nosa lingua como poden ser “Orgullosos no noso. Orgullosos do Galego” que foron un grande éxito de proxección pública.

SE CAMBIAS DE LINGUA, CAMBIAS DE VIDA

2010-11-14T21:02:00.003+01:00

Aquí tedes un anaco dunha interesante entrevista a Sechu Sende, profesor e escritor.

WWW.REDELIBROS.COM, PRIMEIRA REDE SOCIAL GALEGA DE LIBROS

2010-11-12T13:20:00.003+01:00

Para tod@s os que esteades interesad@s en valorar, compartir e recomendar lecturas, participar en concursos ... xa tedes o voso espazo na rede: www.redelibros.com
Se queredes saber máis sobre esta nova aquí tedes información.

NOTA DE PRENSA DA COORDINADORA GALEGA DE ENDL

2010-11-12T13:09:00.003+01:00

A resolución de axudas ao fomento do galego déixalles 7 días aos centros educativos para a súa xustificación A CGENDL denuncia que a tardía resolución das axudas ao fomento do galego correspondentes ao ano 2010 impón prazos de dificil cumprimento e imposibilitan a execución planificada dos proxectos de colexios e institutos, polo tanto dificultan o traballo normalizador nos centros escolares. A resolución publicada o día 3 de novembro obriga a xustificación de facturas por valor dun 25% das axudas con data anterior ao 15 de novembro (7 días lectivos) cando aínda o día 13 remata o prazo de reclamación. A redución dun 25% das axudas no exercicio do 2011, que se suma a un 20% no ano 2010, suporá a eliminación de numerosas actividades de formación do alumnado. A resolución da convocatoria anual das axudas para o fomento do galego no ensino non universitario deuse a coñecer o pasado mércores día 3 deixándolles aos colexios e institutos 7 días lectivos entre o día en que souberon a contía da que dispoñen e o día límite para xustificar parte dos seus proxectos de normalización e dinamización lingüística. A Coordinadora Galega de ENDL considera que o feito de que as bases da convocatoria contemplen que o 25% da contía concedida se deba xustificar antes do día 15 de novembro dificulta enormemente a xustificación orzamentaria das axudas pois a maioría dos centros escolares non desenvolveron as actividades proxectadas polo temor a non dispoñer dos recursos necesarios para que se levasen a cabo. Esta situación agrávase, segundo a CGENDL, se se ten en conta que o prazo para que os centros reclamen a resolución provisional da Secretaría Xeral de Política Lingüística remata tan só dous días antes do vencemento do prazo para a presentación de facturas. Dende a CGENDL laméntase que estes prazos irracionais, aos que hai que sumar a redución drástica de orzamentos (un 20% no 2010 e un 25% no 2011) poñan en perigo e dificulten o labor dos Equipos de Dinamización da Lingua Galega e, en consecuencia, a organización de actividades que melloran a competencia lingüística do alumnado e promoven a superación dos prexuízos existentes sobre a lingua galega.

XORNADA DA CIENCIA EN GALEGO

2010-11-11T18:11:00.006+01:00

O xoves, 4 de novembro, celebramos no noso centro, coma en moitos outros de toda Galiza, a XORNADA DA CIENCIA EN GALEGO. O día chuvioso non lle permitiu ao alumnado de 1º ESO realizar a actividade de deseño de figuras xeométricas no patio, pero celebraron a xornada na súa aula.
@s alumn@s de 3º ESO coa axuda do profesorado elaboraron carteis con vocabulario e imaxes das materias científico-tecnolóxicas. Aquí vos deixamos unhas imaxes para que vexades como transcorreu a xornada.

NÓS E OS LIBROS

2010-10-22T12:33:00.002+02:00

Con motivo da celebración do ano do Libro e a Lectura, o EDLG do IES de Foz convoca o concurso de fotografía Nós e os libros.

BASES

1- Poderán participar tod@s @s alumn@s do centro.

2- O tema das fotografías xirará arredor do libro e a lectura.

3- As fotografías, en branco e negro ou en cor, enviaranse a: xameentendes@gmail.com, facendo constar o nome e apelidos d@ alumn@, o curso e grupo ao que pertence.

4-Cada alumn@ poderá participar cun máximo de tres fotografías.

5- Haberá dúas categorías:
- ESO e Ciclos Medios
- Bacharelato e Ciclos Superiores

6- Prazo de entrega do 25 de outubro ao 12 de novembro.

7- O xurado estará formado por profesorado dos Departamentos de Debuxo e do EDLG. O fallo publicarase no blog www.xameentendes.blogspot.com a partir do 17 de novembro. As fotografías publicaranse no blog do equipo e da biblioteca e con elas realizarase unha exposición no centro.

8- Establécense os seguintes premios para cada unha das categorías:
- Primeiro premio: 30€ (vales de compra)
- Segundo premio: 20€ (vales de compra)

9- Entrega de premios: os premios aso gañadores entregaranse nun acto público en día e hora que previamente se anunciará.

O FOCEGO

2010-07-27T21:48:00.000+02:00

Se queredes botar unha ollada á nosa revista non tedes máisd que premer aquí.

LIBROMATÓN

2010-07-06T19:06:00.002+02:00

Presentámosvos os nosos futuros críticos literarios. A ver que vos parecen. E por certo!! esperamos que o vindeiro curso se anime tamén algún profesor a participasr na actividade. Para velo premede aquí

LETRA GALEGAS 2011

2010-06-27T22:49:00.002+02:00

O poeta monfortino Lois Pereiro, figura homenaxeada nas Letras Galegas de 2011. A noticia en La Voz de Galicia.

XORNADA DE TEATRO

2010-06-27T22:12:00.007+02:00

Os actores e actrices de 1º Bacharelato ofrecéronnos unha magnífica interpretación da obra teatral MILES GLORIOSUS de Plauto. Aínda que os nervios estiveron presentes e provocaron algunha que outra interrupción así como tamén algún ataque repentino de risa, o elenco de actores defendeu perfectamente os seus papeis. O público riuse moito e recoñeceu o esforzo dos actores e actrices. Noraboa polo voso traballo!!!

XOGOS NA PAMPILLOSA

2010-06-27T21:57:00.004+02:00

Chegou o día e o tempo non nos defraudou. Despois de estar a piques de anular a actividade por mor das chuvias continuas que non nos abandonaban, decidimos arriscarnos e preparar a xornada de xogos populares. O día foi perfecto, un pouco anubrado pero cunha temperatura perfecta e o xantar inmellorable. Parabéns para os cociñeiros que cada ano se superan. Deixámosvos unhas imaxes da xornada.

NAVEGAMOS EN GALEGO

2010-06-24T20:26:00.003+02:00

Para tod@s @s pais e nais interesad@s en estar ao día no mundo da internet en galego, ofrecémosvos a posibilidade de curiosear neste pequenos traballo realizado grazas ás aportaciónsd de profesorado e alumnado do noso centro. Entrade e sorprenderédesvos coas posibilidades que nos ofrece a rede na nosa lingua.

COCIÑA CON NÓS

2010-06-24T20:09:00.004+02:00

Presentámosvos o noso pequeno libro de cociña que pensamos seguir enchendo de saborosas receitas. Se queredes ir experimentando con algunha premede aquí

CELEBRAMOS O DÍA DAS LETRAS COS FOCEGOS

2010-05-19T18:26:00.003+02:00

Despois de convocar un concurso de caricaturas de Uxío Novoneyra, e resultando gañadora a presentada por Alberto López Freire de 2º ESO B, elaborouse no centro un marcapáxinas que foi repartido por un grupo de alumnas de 2ºESO nas librarías de Foz para que agasallasen aos focegos no día das Letras Galegas.
Moitas felicidades a Alberto!!! e aquí tedes o resultado do traballo:

MANIFESTACIÓN 17 DE MAIO

2010-05-18T11:56:00.005+02:00

Unha vez máis as rúas de Compostela se encheron de miles de galeg@s dispostos a celebrar o DÍA DAS LETRAS GALEGAS e defender a súa lingua ante os continuos ataques do goberno de Feijoo. Aproveitamos as palabra pronunciadas por Uxío Novoneyra no pregón da feira do libro de Compostela (1987) para enviar unha mensaxe ao presidente da Xunta: "Todos somos galegos e todos temos responsabilidades como tales galegos, e estas responsabilidades van máis aló das ideoloxías, das premisas do propio partido. Responden a algo máis profundo. E non valen medias tintas. Hai que estar, si ou non con Galicia. E non se pode dicir que se está con Galicia cando non se sinte a responsabilidade da pervivencia da nosa lingua como meta primordial".

ENTREVISTA A UXÍO NOVONEYRA

2010-05-14T09:41:00.003+02:00

Esta interesantísima entrevista inédita a Uxío Novoneyra que nos facilita ó IES de Foz o profesor Ramón Reimude foi realizada no ano 1985 no Instituto feminino de Lugo por un grupo de alumnas.

CORRELINGUA 2010 NA MARIÑA

2010-05-12T20:14:00.002+02:00

Aquí tedes unha pequena mostra do bo número de alumn@s de centros educativos da mariña lucense participantes no CORRELINGUA deste ano. A carreira da lingua na súa décima edición comezou o día 3 de maio en Compostela e rematará en Verín o día 14. Arredor de 45. 000 moz@s reivindicarán dunha maneira lúdica a normalización do seu idioma baixo o lema: O GALEGO, A FORZA DO NOSO AMOR.

NOVO REXEITAMENTO AO DECRETO DO PLURILINGÜISMO

2010-05-12T17:20:00.002+02:00

O informe do Consello Consultivo sobre o Decreto do Plurilingüismo probablemente non vai ser do gusto do noso conselleiro de educación nin, por suposto, do secretario xeral de política lingüística. Este informe sumarase ao do Consello da Cultura Galega, ao da RAG e ao do Consello Escolar de Galicia. Evidentemente, como se trata dun órgano meramente consultivo, A Xunta de Galicia, continuando na súa liña, fará oídos xordos e non terá en conta este novo informe. Está claro que as promesas electorais a determinados sectores pesan moito. Non si?. A noticia en O Xornal.

Queremos Galego consegue a adhesión de 4.530 profesoras e profesores á campaña “Dou e darei as clases en galego”

2010-05-09T22:14:00.001+02:00

ACHEGÁMONOS AO TEATRO

2010-05-03T18:22:00.003+02:00

FRAN PAREDES, actor da compañía TEATRO DE NINGURES estivo con nós no instituto para presentarnos a obra ATRA BILE de Laila Ripol. Esa mesma tarde @s compoñentes do grupo teatral poñían en escena a obra na sala Bahía de Foz. Despois de falarnos un pouquiño sobre o argumento da obra e os seus personaxes, tivemos a oportunidade de facerlle preguntas sobre o seu traballo de actor e outras curiosidades relacionadas coa actividade teatral. Dámoslle as grazas pola súa visita e por responder de tan bo grado as nosas cuestións.

ANTONIO REIGOSA NO IES DE FOZ

2010-05-02T20:01:00.004+02:00

O escritor ANTONIO REIGOSA estivo con nós hai unhas semanas e contounos moitas cousas interesantes (que a maioría de nós descoñeciamos) sobre lendas e personaxes míticos (trasnos, meigas, vellas, mouros-as, tía Xoana ...). A presentación da actividade foi entretida e a comunicación moi boa xa que nós tamén puidemos participar e falar sobre lendas que coñeciamos. Gustaríame volver a participar nesta actividade.

MARÍA DEL MAR GARCÍA GARCÍA, 2º ESO

A COVA DA PRAIA DA RAPADOIRA

2010-05-02T19:43:00.003+02:00

O venres 23 de abril visitou o noso insti ANTONIO REIGOSA e na biblioteca presentounos axudado de imaxes lendas e mitos da mariña lucense e falounos tamén de personaxes míticos de longa tradición en Galicia.
A min gustoume a lenda da pena da salsa de Fazouro xa que coñezo o lugar e non sabía que existisen lendas localizadas nel. Pero a lenda que fixo que me interesase aínda máis a actividade foi a da cova da praia da Rapadoira p orque no verán entrei moitas veces nela cos meus amigos para explorala. Gustaríame coñecer máis datos sobre os misterios que garda a cova. Sería pois boa idea que Antonio Reigosa volvese ao noso centro o próximo cursopara contarnos máis lendas.

RICHARD GONZÁLEZ VEIGA, 2º ESO

UNHA ACTIVIDADE ENTRETIDA

2010-05-02T19:32:00.003+02:00

A actividade en que participamos @s alumn@s de 2º ESO e que trataba sobre mitos e lendas da mariña gustoume e ademais permitiu que soubese da existencia do dicionario dos seres mitolóxicos, escrito por ANTONIO REIGOSA. Algunhas das lendas que nos contou están localizadas en lugares que coñecemos e a maneira que tivo de explicalas, axudado co imaxes foi moi entretido xa que nos axudou a imaxinar como sería a lenda.
Falounos tamén de personaxes míticos como os trasnos, dos cales hai moi diferentes tipos.
a actividade pareceume interesante xa que é unha maneira doada de coñecer lendas que nosos pais xa coñecen.

MELLY DÍAZ ANDRADE, 2º ESO

A CASA DA ESPIÑEIRA

2010-05-02T11:41:00.005+02:00

O venres, 16 de abrilo, estivo con nós ANTONIO REIGOSA, escritor e recompilador de lendas. Contounos moitas lendas da mariña lucense e unha delas foi a da CASA DA ESPIÑEIRA, xa coñecida por min. El contounos que o home da casa se fora loitar á guerra e deixara a súa familia soa. Pasaron os anos e un día chegou a mala nova de que o home falecera. A familia estaba moi triste. Pasou o tempo e unha noite a filla máis nova foi pechar as contras e viu unha man pasando pola beira do camiño. Así continuou durante varias noites. Un día, a filla moi asustada percibiu a estraña man coma sempre, pero esa noite notou que se acercaba á ventá. Viu horrorizada como ía aparecendo a figura do pai, que antes de descansar para sempre en paz, necesitaba ver a súa familia por última vez para pedirlles que foran a San Andrés de Teixido, xa que el non o puidera facer en vida. A familia cumpriu o que o pai lles pedira e nunca máis volveu aparecer.
Eu coñecía esta lenda contada por miña avoa, pero en vez dunha man o que aparecía eran luces que representaban a alma do defunto.

JULIA GARCÍA CURRÁS, 2º ESO

A LENDA DA VILA DA MIÑA NAI

2010-05-02T11:23:00.003+02:00

Hai unhas semanas participamos nunha actividade organizada polo ENDL e a BIBLIOTECA do noso IES. O tema trataba sobre LENDAS E MITOS DA MARIÑA e o poñente foi o escritor ANTONIO REIGOSA.
Comezou contándonos os lugares que percorreu para recoller as lendas e tamén os sitios onde se localizaban. Un dos lugares do que nos falou foi As penas da salsa (Fazouro) e tamén nos explicou os distintos personaxes mitolóxicos que había na Mariña e o que facían: mouras, trasnos, o home do saco, sereas ..., pero aínda que el non o nomeou, meus pais cando eu era pequeniña, falábanme do SACAUNTOS.
Ademais explicounos a diferenza entre as lendas tradicionais e as urbanas e tamén nos dixo que para que as lendas pervivan no tempo teñen que actualizarse.
Como só nos falou de lendas localizadas na Mariña, a min gustaríame contarlle esta lenda da vila da miña nai: hai moitos anos nunha vila que estaba baixo o mandato do Conde de Lemos, un día uns aldeáns viron unha persoa cunha pelica mallando os habitantes do lugar. Todos pensaron que era un recadador de impostos pero a nobreza dixo que non estaba ao seu cargo. Nunca se soubo quen ou que era, pero aínda hoxe nas festas patronais aparece esa figura e malla na xente.

SABELA FERNÁNDEZ RODICIO, 2º ESO

UN HOME NA ESTRADA

2010-05-02T11:13:00.003+02:00

ANTONIO REIGOSA visitou o noso centro o día 23 de abril e falounos sobre un tema moi interesante: lendas e mitos da mariña.
As lendas son contos ou historias tradicionais que van pasando de xeración en xeración. Por iso, moitas persoas coñecen a mesma historia pero con algúns feitos distintos. E esas lendas tradicionais poden dar lugar ao que hoxe coñecemos como lendas urbanas.
A que maís me gustou foi a seguinte: trataba sobre un home que aparecía no medio da noite nunha estrada. Este paraba a toda a xente que atopaba e dáballes dúas opcións para escoller: unha gravata ou unha boca de pallaso. Aos que escolían a primeira opción, cortáballes a gorxa e logo sacáballes a lingua. Pero se pola contra escollían a segunda, facíalles un corte en cada un dos extremos dos beizos e así quedaban para o resto dos seus días.

NOELIA PILLADO FRAGA, 2º ESO

PARA CONTAR UNHA LENDA HAI QUE CRER NELA

2010-05-02T11:01:00.003+02:00

A verdade é que a charla de Antonio Reigosa foi moi interesante. Algunhas das lendas das que nos falou xa as coñecía porque están localizadas moi preto de onde eu vivo, e outras, como a da Espiñeira, que era a primeira vez que escoitaba, chamaron a miña atención. A verdade é que a min sempre me gustaron as lendas, sobre todo as de lugares que coñezo porque deixo voar a miña imaxinación e localízoas na miña mente.
Creo que ANTONIO REIGOSA dalgunha maneira nos quixo transmitir que quen cre nunha lenda é quen de contala e se non a cre, non a conta.
Gustaríame felicitar ao escritor polo seu libro MEMORIAS DUN RAPOSO co que me rin moito léndoo.

ALBA DÍAZ FERNÁNDEZ, 2º ESO

LENDAS DA MARIÑA

2010-05-02T10:52:00.002+02:00

Xa hai uns días que estivo no noso centro ANTONIO REIGOSA para nos contar unha morea de lendas da Mariña de Lugo. Eu, moitas delas non as coñecía; nin sequera oíra falar delas. Pero si que coñecía unha que acontece nunha curva da antiga estrada de Mondoñedo e outra que trata sobre un coche que circula pola noite sen as luces acesas.
A súa visita gustoume moito xa que nos transmitiu lendas localizadas e recollidas en lugares moi preto da nosa vila e que moitos de nós descoñeciamos. Espero que volva outro día e nos poida seguir contando moitas máis.

SOFÍA DÍAZ BASANTA, 2º ESO

TRABALLOS CONCURSO DE LOGOS

2010-05-02T09:54:00.013+02:00

Como vos prometemos amosámosvos os traballos presentados ao CONCURSO DE LOGOS do ENDL. Agardamos as vosas opinións para axudarnos a decidir cal é o traballo gañador.

CONCURSO DE CARICATURAS

2010-05-02T09:37:00.001+02:00

O Equipo de Normalización e Dinamización Lingüística (ENDL) do IES de Foz convoca un concurso de caricaturas sobre a figura de UXÍO NOVONEYRA, autor homenaxeado nas LETRAS GALEGAS 2010.

BASES

1- Poderán participar tod@s @s alumn@s do IES.
2- Cada alumn@ poderá presentar un máximo de tres debuxos.
3- As caricaturas poderan ser realizadas en cor ou branco e negro e empregando calquera técnica gráfica.
4- Os traballos poderánse presentar en formato A4 ou A3
5- Os traballos entregaranse aos profesore-as de Plástica ou aos profesores-as do ENDL do centro.

6- Na parte posterior dos debuxos incluirase o nome e apelidos d@ participante e o curso/grupo ao que pertence.
7- O prazo de presentación dos traballos rematará o 7 de maio (venres)
8- O xurado estará composto por profesorado da materia de plástica e membros do ENDL.
9- Haberá un único premio para o traballo mellor valorado. O premio consistirá nun vale de compra de 20 €

Os traballos serán colgados no blogue do equipo (xameentendes.blogspot.com).O fallo do xurado farase público no blogue do equipo e no da biblioteca na última semana de abril.

O traballo gañador será empregado para elaborar un marcapáxinas conmemorativo do Día das Letras Galegas 2010.

PARABÉNS PARA IKEA

2010-04-30T13:31:00.002+02:00

O novo establecemento de IKEA na Coruña, que abrirá as súas portas no vindeiro mes de xullo, ofrecerá unha versión en galego do seu catálogo. Tamén a súa páxina web estará dispoñible na nosa lingua. Haberá que esperar ao mes de setembro (mes de cambio dos catálogos) para dispoñer da versión en galego. Loamos a súa iniciativa e animamos a todas as empresas a que sigan o seu exemplo.

MANIFESTO CORRELINGUA 2010

2010-04-28T12:23:00.003+02:00

Por se aínda non estades enterados, informávosvos de que os gañadores do manifesto deste ano foron @s alumn@s do IES PORTA DA AUGA de Ribadeo. Dende aquí enviámoslles os nosos máis sinceiros parabéns.

para ver o seu traballo premede aquí.

NORABOA !!!

2010-04-28T12:06:00.003+02:00

Os nosos parabéns aos gañadores do concurso de SMS de amor. A gañadora do premio ao SMS máis orixinal é Genma Moreda Mariño (1º ESO B). Esta foi a súa mensaxe:

1+1 son 2 ollos nos q m perdo
2+2 " 4 bicos q ch dou
4+4 " 8 letras d 1 t quero
8+8 " 16 bagoas q choro
E o = é 1 irrompible

E o gañador do premio ao SMS máis divertido é Cristian García Rodríguez (Bacharelato Adultos). Este é o seu SMS:

O meu amor latexa por ti coma as vacas cando turran contra as súas comedeiras.

O NOSO AGRADECEMENTO

2010-04-27T11:16:00.005+02:00

O ENDL quere agradecer aos alumnos de 1º, 2º, 3º e 4º ESO que participaron na gravación do programa BEN FALADO da TVG a súa colaboración e o seu entusiasmo.

Aínda que tod@s estaban moi nerviosos e preocupados xa que era a 1ª vez que se poñían diante dunha cámara, o resultado foi moi bo. Tod@s se defenderon perfectamente e explicaron de marabilla en que consistían as actividades das Árbores Políglotas, o concurso de SMS de amor e os alcumes.

Como o prometido é debeda, seredes os primeiros en coñecer a data de emisión dos programas,

Moitas grazas pola vosa colaboración!!!

PROMOCIONA A TÚA VILA

2010-04-08T20:26:00.002+02:00

O Equipo de Normalización e Dinamización Lingüística (ENDL) do IES de Foz convoca un concurso para promocionar o concello de Foz.

Trátase de facer unha reportaxe sobre Foz para salientar os principais aspectos da súa paisaxe, economía, costumes, festas, tradicións… Poderase tamén realizar entrevistas a xente da vila implicada dalgún xeito na vida cultural ou coñecedora dos costumes, forma de vida, tradicións …

BASES

1- Poderán participar tod@s @s alumn@s do IES.
2- Os traballos poderánse presentar en formato dixital (vídeo, PowerPoint...)

3- Os traballos poderán ser enviados á seguinte conta de correo: actividadesfoz@gmail.com ou entregalos en man a calquera membro do ENDL
4- Xunto co traballo incluirase o nome e apelidos d@ participante e o curso/grupo ao que pertence.
5- O prazo de presentación dos traballos rematará o 26 de abril (luns)
6- O xurado estará composto por profesorado das materias de plástica e de informática

7- Haberá un único premio para o traballo mellor valorado. O premio consistirá nun vale de compra de 50 €

Os traballos serán colgados no blogue do equipo e no da biblioteca (xameentendes.blogspot.com, chavedasnoces.blogspot.com) e en YouTube (no caso dos vídeos)

O fallo do xurado farase público no blogue do equipo e no da biblioteca na última semana de abril.

CONCURSO DE LOGOS

2010-04-08T19:55:00.003+02:00

O Equipo de Normalización e Dinamización Lingüística (ENDL) do IES de Foz convoca un concurso de logotipos que o identifique e que dalgunha maneira transmita o significado do que representa o equipo.

BASES
1- Poderán participar tod@s @s alumn@s do IES.
2- Cada alumn@ poderá presentar ata tres logos.
3- O logo deberá conter as siglas ENDL
4- Os traballos poderánse presentar en calquera formato
5- Os traballos poderán ser enviados á seguinte conta de correo: actividadesfoz@gmail.com ou entregalos en man a calquera membro do ENDL
6- Xunto co logo incluirase o nome e apelidos d@ participante e o curso/grupo ao que pertence.
7- O prazo de presentación dos traballos rematará o 26 de abril (luns)
8- O xurado estará composto por profesorado das materias de plástica.
9- Haberá un único premio para o traballo mellor valorado. O premio consistirá nun vale de compra de 20 €

Os traballos serán colgados no blogue do equipo (xameentendes.blogspot.com), onde todo o alumnado poderá manifestar a súa opinión sobre eles. Estas opinións serán tidas en conta polo xurado.

O fallo do xurado farase público no blogue do equipo e no da biblioteca na última semana de abril.

O logo seleccionado empregarase como identificativo do ENDL.

ANIMÁDEVOS E PARTICIPADE!!!

PEP BRUNO E MARIONA CABASSA GAÑAN O III PREMIO INTERNACIONAL COMPOSTELA COA OBRA “LA FAMILIA C”

2010-04-07T20:08:00.002+02:00

A obra titulada “La Familia C”, con texto de Pep Bruno (Barcelona, 1971) e ilustracións de Mariona Cabassa (Barcelona, 1977), é a gañadora do III Premio Internacional Compostela para Álbums Ilustrados. O galardón, cunha dotación de 12.000 euros, conleva a publicación do libro en galego, castelán, catalán, euskera e portugués. Os traballos do catalán Raimon Juventeny Corberó, “Manual del buen paseante. Descripción en veinte puntos”, e da arxentina Vanina Soledad Starkoff, “Bailar en las nubes”, son os finalistas do certame.
O fallo do III Premio Internacional Compostela de Álbum Ilustrado marca o inicio da X Campaña de Animación á Lectura que organizan o Departamento de Educación do Concello de Santiago e KALANDRAKA, en colaboración coa Galería Sargadelos. Co lema “Un gran soño”, a campaña vólcase un ano máis en desenvolver actividades dirixidas a pre-lectores, escolares, educadores, bibliotecarios e promotores de lectura, público familiar e, por primeira vez, futuros creadores artísticos. Ata o 22 de maio, o programa ofrece sesións de contos e música, visitas guiadas á exposición de ilustracións e obxectos artísticos, obradoiros de escrita creativa e de ilustración, actividades formativas para o profesorado, encontros con ilustradores e charlas para familias.

MOI INTERESANTE!!!

2010-03-17T16:15:00.001+01:00

Recomendámosvos ler o artigo "Aterse ás consecuencias" de María Reimóndez publicado hoxe en O Xornal.

ENTROIDO 2010

2010-03-12T19:59:00.001+01:00

Por segundo ano consecutivo celebramos a festa do entroido no noso insti. Aquí vos deixamos unha selección de fotos para que poidades lembrar o ben que o pasamos ese día.

LUÍSA CASTRO DE NOVO GALARDOADA

2010-03-12T17:54:00.004+01:00

A escritora focega Luísa Castro recollerá hoxe o premio Pura Cora de Xornalismo. A noticia en El Progreso.

DESVÁN DE LOS MONJES E TORO, NOVOS TOPÓNIMOS

2010-03-09T11:08:00.002+01:00

Que mágoa!!! O Conselleiro de Cultura non coñece a toponimia galega. Vai promocionar Galicia na feira FITUR e non se lle ocorre mellor idea que traducir os topónimos Touro e Sobrado dos Monxes como "Toro" e "Desván de los monjes". Pero o peor de todo é que despois de facelo, negouno con rotundidade. Escoitádeo neste vídeo da presentación e veredes que ocorreu realmente.

A ESMORGA SEN CENSURA

2010-03-06T21:09:00.003+01:00

A obra de Blanco Amor, na versión orixinal escrita polo autor en 1955, será publicada pola editorial Galaxia antes de que remate o ano. A noticia en Vieiros.

JOAN BAEZ HOMENAXEA A ROSALÍA DE CASTRO

2010-03-06T20:41:00.002+01:00

Joan Baez, a madriña do folk, namorou o publico vigués no seu concerto de onte, cando cantou, en perfecto galego o Adiós Ríos, adiós fontes de Rosalía de Castro, a coro cun Teatro Caixanova de Vigo cheo a rebentar.Este concerto, unico en Galicia, inclúese dentro do ciclo XACOBEO IMPORTA.
Esta noite bota tamén a andar o ciclo GALICIA RAÍCES coa actuación do grupo Fuxan os Ventos e continuará os próximos tres meses con concertos como os que ofrecerán Cristina Pato e Muntenrhoi o 10 de abril en Ferrol, o da fadista María do Ceo e o grupo Brath en Vilalba ou o do 24 de abril en Lugo de Susana Seivane e Quenpallou. En maio, Uxía e Leilía actuarán en Rianxo o 22 e Rosa Cedrón, o 28 en Valga. Por último, Luar na Lubre tocará o 6 de xuño cun concerto en Santiago.

ROSA ANEIROS NO IES DE FOZ

2010-03-04T18:03:00.002+01:00

A escritora Rosa Aneiros visitou o noso centro o pasado 5 de febreiro. O alumnado de 3º Eso conversou con ela e tivo a posibilidade de facerlle preguntas sobre o seu labor de escritora así como tamén comentar algúns aspectos relacionados coa súa obra Ás de bolboreta.Ao remate da actividade, dúa alumnas de 2º Eso entrevistaron á autora que amablemente respondeu a todas as súas preguntas. Deixámosvos unhas fotos da súa visita e proximamente colgaremos unha pequena reportaxe videográfica.

CONCURSO DE SMS

2010-03-04T17:35:00.004+01:00

Aínda que como ben sabedes o día dos namorados xa se celebrou, cremos que sempre é un bo momento para animarse a escribir unha nota agarimosa, unha mensaxe chea de amor ou simplemente dedicar a algúen un piropo. Convidámosvos pois a participar no concurso SMS CON AMOR. Aquí tedes as bases.

SMS CON AMOR

O ENDL e a biblioteca convocan o 1º concurso de sms en galego. O tema seleccionado é O AMOR en todas as súas vertentes. Poderedes facer una declaración de amor, unha mensaxe agarimosa para un amigo-a, expresar sentimentos ou pensamentos amorosos …
BASES
1- Poderán participar tod@s @s alumn@s do IES.
2- Cada alumn@ poderá presentar ata tres sms.
3- O texto non excederá de 100 caracteres excluídos os espazos.
4- Poderase empregar a “linguaxe” característica dos sms.
5- Os traballos serán enviados á seguinte conta de correo: actividadesfoz@gmail.com
6- Xunto co texto incluirase o nome e apelidos d@ participante e o curso/grupo ao que pertence.
7- O prazo de presentación dos traballos rematará o 25 de marzo (xoves)
8- O xurado estará composto por profesorado das materias de linguas.
9- Haberá dous premios:
- Sms máis orixinal
- Sms máis divertido

10- @s alumn@s agasallados recibirán como premio unha memoria USB

ORGULLOSOS DO NOSO, ORGULLOSOS DO GALEGO

2010-02-28T20:13:00.006+01:00

Este é o título da campaña elaborada pola Coordinadora Galega de ENDL e que se presenta con dúas partes. Unha , con materiais para imprimir e distribuír a través dos ENDL dos centros educativos e aos que tamén pode ter acceso calquera persoa interesada. E outra, cos vídeos que vos presentamos a continuación.
O que pretende a Coordinadora é amosar o orgullo que temos @s galeg@s pola nosa lingua porque somos moit@ @s que estamos orgullos@s de termos unha lingua propia.

CLUBE DE LECTURA A POMBA DO ARCO

2010-02-28T19:34:00.003+01:00

A asociación sociocultural focega A POMBA DO ARCO acaba de inaugurar o seu clube de lectura. A primeira reunión tivo lugar o 18 de febreiro e a próxima celebrarase o 25 de marzo.Cada mes lerase un libro en galego e as reunións celebraranse o último xoves de cada mes no local da asociación, na casa do mar. Ademais da lectura realizaranse actividades complementarias como encontros con autor@s, presentacións de libros ... Tod@s @s que esteades interesad@s en participar tedes información en http://clubedelecturaapombadoarco.blogaliza.org/

CALENDARIO 2010

2010-02-25T14:17:00.004+01:00

Presentámosvos, aínda que cun pouco de retraso, o calendario do ano 2010 elaborado polo ENDL. Esperamos que vos guste e vos sexa de utilidade a prof@s e alumn@s.Aquí o tedes.

ESTE ANO OS GOYAS FALARON EN GALEGO

2010-02-18T14:15:00.006+01:00

O actor galego Luís Tosar recibiu o seu terceiro Goya pola interpretación como protagonista no filme CELDA 211. No seu discurso de agradecemento o actor empregou o seu idioma demostrando o orgulloso que se sente da súa lingua. Unha vez máis queda ben claro que o galego non é ningún impedimento para chegar lonxe senón todo o contrario. Estarían preocupados o sr. Feijoo e o conselleiro de cultura alí presentes por se alguén non entendeu as palabras do actor???
A directora da produtora tamén quixo deixar constancia da orixe galega da empresa polo que optou tamén por pronunciar unhas palabras na súa lingua.

UN ANO MÁIS AGASALLAMOS EN GALEGO

2010-02-18T13:57:00.003+01:00

@s alumn@s colaboradores do ENDL repartiron a semana pasada entre @s comerciantes foceg@s etiquetas para agasallar en galego. A campaña iniciada xa hai dous anos continúa tendo unha boa acollida entre o empresariado que manifesta as dificultades coas que se atopan para conseguir este tipo de material en galego. Presentámosvos o traballo realizado polo departamento de Plástica.

AS ÁRBORES POLÍGLOTAS

2010-02-10T13:42:00.006+01:00

Presentámosvos os primeiros froitos das nosas árbores políglotas. Trátase dunha actividade coa que conmemoraremos cada mes datas significativas tales como O Día da Paz, O día da Lingua Materna ... e ademais pretendemos insistir na idea de que todas as linguas son VÁLIDAS. Nas follas penduradas no teito da nosa biblioteca aparecen palabras en distintas linguas (castelán, galego, francés, árabe, grego, latín e inglés) relacionadas coas datas escollidas.

ANXO LORENZO EN APUROS

2010-02-04T22:25:00.007+01:00

O día 30 do pasado mes, ao remate da Xornada de Formación dos Premios á Innovación en Normalización Lingüística, produciuse un interesantísimo debate entre @s mestr@s e profesor@s alí presentes e o Secretario Xeral de Política Lingüística. Recomendámosvos ver o vídeo "As aulas e o despacho" que recolle o momento.
http://vimeo.com/9173324

OS LIBROS ARDEN MAL de Manuel Rivas xa ten versión inglesa

2010-02-04T21:36:00.003+01:00

O libro traducido ao inglés (Books burn badly) será presentado en Londres polo seu autor e o tradutor, Jonathan Dunne, quen hai doce anos que interpreta ao escritor. Despois do éxito da tradución d´O lapis do carpinteiro (12.000 exemplares), o tradutor cre que a tradución d´Os libros arden mal é "un paso xigante para Rivas e a literatura galega".
Jonathan Dunne afirma que "é unha mágoa que ese camiño aberto por Rivas estea completamente desaproveitado”. “Precísanse máis traducións ao inglés, pero non feitas en quince días, senón de calidade, e un esforzo moito maior na internacionalización da literatura e a cultura galegas”.

A noticia en Xornal de Galicia

AS BASES DO DECRETO DO PLURILINGÜISMO SEGUEN A RECIBIR DURAS CRÍTICAS

2010-02-04T21:04:00.004+01:00

O Ditame do CONSELLO DA CULTURA GALEGA realiza rigorosas críticas a varios puntos das “Bases” e expóñense propostas alternativas que poidan ser recollidas no eventual decreto a que aquelas poidan dar lugar.

Puntos máis destacados do Ditame:

1. O Decreto ou norma a que dean lugar estas “Bases” debe centrarse exclusivamente na regulación do uso das linguas oficiais no sistema educativo e na promoción do idioma galego.

2. A lingua da Administración educativa, dos centros de ensino dependentes dela e do persoal ao seu servizo debe continuar a ser, con carácter xeral, a lingua galega, como se recolle no Decreto de 2007 actualmente vixente.

3. A utilización vehicular da lingua estranxeira debe ser introducida de xeito gradual e voluntario, acompañada de medidas de reforzo, como sucede na maioría dos países do noso entorno europeu. A Formación profesional específica e as ensinanzas artísticas e deportivas deben tamén beneficiarse desas medidas.

4. Na etapa de educación infantil, debe seguirse como criterio xeral o uso na aula da lingua predominante entre o alumnado. Ao mesmo tempo, o Consello recomenda prestar unha maior atención á lingua minoritaria nas aulas.

5. As linguas vehiculares no ensino da Educación primaria, Secundaria obrigatoria e Bacharelato deben ser reguladas á luz do preceptuado no Plan Xeral de Normalización da Lingua Galega cando dispón que “como mínimo, o alumnado reciba o 50% da súa docencia en galego”, dado que se trata, máis que de equilibrio ou paridade entre linguas iguais, de evitar as desigualdades con que de partida conta a lingua galega.

6. As previsións referentes á consulta vinculante ás familias para a determinación do uso do galego ou o castelán como linguas vehiculares nunha serie de materias da Educación primaria, secundaria obrigatoria e Bacharelato deben decaer, tanto por razóns de principio como por cuestións prácticas e de procedemento.

Podedes ver o informe completo.

AS 55 MENTIRAS SOBRE A LINGUA GALEGA

2010-02-04T14:10:00.004+01:00

A plataforma Prolingua presentará un libro no que desmonta as principais falacias sobre o idioma que nos é propio.

Fóra prexuízos, falsas teses de imposición lingüística, fóra tópicos. A plataforma Prolingua presentará o vindeiro venres 5 de febreiro o libro '55 mentiras sobre a lingua galega'. A publicación, coordinada polo profesor Xosé Henrique Costas, pretende ser un argumentario sinxelo e clarificador, ao tempo que sólido e rigoroso, que axude a sociedade galega a comprender e superar aquelas valoracións e interpretacións subxectivas, ideoloxizadas desde unha óptica exclusivamente partidista, erróneas ou perversas que perseguen o obxectivo de actuaren de freo ao camiño da necesaria reposición e normalización de usos para a lingua galega no seo da súa sociedade.”

Pero un dos aspectos máis chamativos da presentación do 5 de febreiro é que se fará de xeito simultáneo en máis de medio cento de cidade e vilas de Galiza e do estranxeiro. Así, á mesma hora, diferentes persoas encargaranse de dar a coñecer a publicación nas principais cabezas de comarca do país; en cinco localidades do Estado Español (Ponferrada, Madrid, Barcelona, Gasteiz e Trintxerpe). O libro tamén se dará a coñecer esa mesmas xornada en Tübingen, Bos Aires, Lisboa, Tel Aviv, Nova York, Bethelem, Nablús, París, Saraievo, Londres, Bruxelas e Copenhague.

CONTOS SEN MEDO

2010-02-02T11:12:00.005+01:00

O grupo Tropa de trapo presentou o espectáculo "Contos sen medo" no noso centro. @s alumn@s de 4º Eso e 1º Bacharelato participaron activamente no obradoiro de improvisación. Podedes ver a súa actuación no seguinte vídeo.

MÁIS NOVAS SOBRE O DECRETO

2010-02-02T10:49:00.002+01:00

O ditame do Consello da cultura Galega sobre o novo decreto do galego no ensino xa foi enviado á Xunta. O organismo presentará as súa conclusións de forma pública na xornada de hoxe.
Credes que o seu traballo será tido en conta ou ignorado, por non ser vinculante, pola Xunta de Galicia?. Podedes ler a noticia.

ANXO LORENZO E AS "SÚAS ACLARACIÓNS"

2010-02-01T19:34:00.002+01:00

O brillante Secretario Xeral de Política Lingúística segue na súa liña de falar sen dicir nada. Anuncia que o novo decreto estará en febreiro e cun reparto ao 50% entre galego e castelán e recoñece que aínda lles quedan algúns "asuntiños" por solucionar. Refírese entre outros aspectos ao proceso de consulta a pais para que elixan o idioma e ao tema dos libros de texto, que parece que quedará aínda pendente no próximo curso escolar.
Como é que non se lles ocorreu pensar na maneira de poñer en práctica o proxecto antes de elaborar as bases? Pequenos lapsus do novo goberno autonómico!!
A noticia completa en O Xornal